Showing posts with label Urdu. Show all posts
Showing posts with label Urdu. Show all posts

تیری یاد کے سوا کچھ یاد نہیں

 تیری یاد کے سوا کچھ یاد نہیں

میں لامکاں کب سے کچھ یاد نہیں
روابط خاموشی کی زدّ میں ہیں
قیامِ خاموشی کب سے یاد نہیں

عکس کاری

جب وقت کاری گزرتا ہے میں عکس کاری کرتا ہوں اور بلاعنوان خاکوں سے معتبر چہروں کی بات کرتا ہوں، جب دونوں ہم کلام ہوتے یہ اَن سُنی کہاوتیں افسانہ بن جاتیں ہیں، ان افسانوں میں بلا کی کردارسازی ہے میں ان کرداروں کو تصویر کرکے لمحے کی اسیری سے رہا اور وقت کی راہ پہ گامزن کرتا ہوں.
یہ میرے کردار ہیں یوں میں انہیں خود تحریر کرتا ہوں گویا وقت کو تصویر کرتا ہوں.
ظہیر چوہدری۔


پرزّم سے مشروط منشور


 

پرزّم سے مشروط منشور۔

یہ رنگین مسجد میرے بچپن میں بس اک سفیدی کئے ہوئے کمرے کی مسجد تھی، ڈیڑہ دو فٹ اونچی ایک اینٹ کی دیوار والا چھوٹا سا اینٹوں والا صحن اور اِسی بُڑھے برگد کی چھاؤں سے پانی ٹھنڈا کرتی، سِکھ دور سے بنے اک گول تھڑے کے اونچا کُھرے میں لگی صرف ایک پیتل کی ٹوٹی ہوا کرتی تھی، جب کسی کو پیاس لگتی تو گویا سب کو لگ جاتی۔ ہم پرندوں کے جھنڈ کی مانند پہلی باری کا مقصد لیے بھاگتے اور بڑے پہلے پہنچ جاتے مگر پھر بھی چھوٹوں کے پہنچنے کا انتظار ہوتا اور پہلے پانی پینے کیلئے انہیں ہی آگے کیا جاتا، "پہل اور اپنی باری کا انتظار" اس تمام میں یہ درس پنہاں تھا۔
پاکپتن کے انگریز دور کے اس ریلوے لوکو شیڈ کے سامنے دو چھوٹی چھوٹی گھنی گھاس کی، اک تکونی اور اک مستطیلی میدان ہمارے کھیلنے اور کام شام کرنے کا ڈیرہ ہوتیں اور خاص طور پر مستطیلی میدان کیوں کہ گھنا، بڑا اور پرندوں کی آوازوں اور گُلہریوں سے بھرا برگد کا پیڑ اسکی آخری نکڑ میں ہوتے ہوئے بھی سارے میدان کا احاطہ اپنی چھاؤں سے کرتا۔
ہم گرمیوں کی چھٹیوں میں یہاں آکر خوب کھیلتے، پوری پوری کتابوں کو لکھ کر لانے والے چھٹیوں کے اُس کام کو بھی بخوبی کرتے۔
دوپہر کو آنے والی لمبی سمّہ سٹھّہ ایکسپریس ڈائون کے لاہور سے آنے اور سمّہ سٹھّہ جانے کے اوقات پر کام چھوڑ دیے جاتے جیسے یہ کام کاج اور پڑھائی کوئی فارغ اوقات کے مشغلے ہوں اور اصل کام اب سے شروع ہونا ہو۔
من سے دیکھی درینہ دوست جیسی، جسکو سمجھتے وقت کو بھی صدیوں کے دوراہوں سے گزرنا پڑتا، ابھی تک نا نظر والی، دُور سے آتی گاڑی کی لمبی سیٹی اک استدعا بن کر پھاٹک والے تک آتی، پھاٹک وقت پہ بند ہوتا اور اس سے دائیں اور بائیں، دربار بابا فرید، غلہ منڈی سے کچھری، فرید نگر، کینال کالونی اور شہر کے باھر سے آتے جاتے تانگوں، گدھا گاڑیوں، ٹریکٹر ٹرالیوں اور سائیکلوں سے بھر جاتے۔ گاڑی اسٹیشن کے پاس والے اُس پھاٹک کو کراس کرتی اور اسکی دوسری قدرِ مختلف سیٹی کی آواز قریب والوں کیلئے با خبر کرنے اور نوید کی صدا ہوتی، استدعا سے صدا کا یہ سفر محظ لمحوں کا ہوتا۔
اسٹیشن پہ موجود ہر مسافر، اسٹیشن کا عملا، نارنجی کُرتوں والے کُلیّوں، ڈھابے والے ھاکروں اور ہماری طرف سے پہلے توجہ طلب، سرخ اور سبز تکونی جھنڈیاں لیئے سفید یونیفارم والے انکل، جنکی دو رنگوں والی جھنڈیوں کو کب کب اور ٹرین کے کہاں تک آنے پہ لہرایاجانا ہے یہ ہم بھی سیکھ چکے تھے، گویا یہ تھا " "استدعا سے صدا" اور "اک اشارے پہ تعمیل کا سبق"، گاڑی کو چند قوس دور سے اسٹیشن پہ آتے، رُکرتے اور پھر سیٹی کی آواز اور گاڑی کے دوبارہ چلنے کے اوقات کا احاطہ کرنا سب اس غیر درج، غیر رسمی اور بنا امتحانی سلیبس کا حصہ تھے۔
جہاں ہم بیٹھے ہوئے ہوتے وہیں قریب وہ مقام تھا جہاں ٹرین اسٹیشن والی پٹڑی چھوڑ کر مین ٹریک پہ آتی، ہم بچپن سے جیسے "ٹریک اور آف دی ٹریک تھیوری" سیکھ رھے تھے۔
لاھور اور سمّہ سٹھّہ کے بیچ پاکپتن سب سے بڑی لوکو موٹر شیڈ تھا، ٹرین سے علیحدہ ہو کر تھکا انجن یہاں اپنے روز کے سفر کی ضروری دیکھ بھال کیلئے آتے، انجن کو شیڈ تک آنے کیلئے اک چھوٹا تکونا سفر کرنا پڑتا، اسٹیشن والی لائین بدل کر شیڈ والی لائین تک ڈرائیور کو دیکھائی جانے والی تمام لال اور ھری تکونی جھنڈیاں کب اور کہاں لہرائی جائیں گی یہ سب ہم کو بھی یاد تھا۔
مسجد کے اس پار انجن اور ہم، اک ساتھ شیڈ پہ پہنچ جاتے اس دوران بچوں کو شیڈ کے عین نیچے جانے کی اجازت نا ہوتی ہم اپنے بستے، کھلی کتابیں، کاپیاں اور امی کے ہاتھ کے سلے موٹی کدوئی والے پیپروں کے دستے سب وہیں کٌھلے چھوڑ کر انجن سے اسکے سفر کا حال احوال کرنے پہنچ جاتے، اسکی آپ بیتی ہمیں اسکی مختلف آوازوں، ڈرائیور اور شیڈ انجنیئرز کی باہمی گفتگو سے معلوم ہوتی۔
ہم بڑے خوش قسمت رہے اپنے سکول دور میں کالا انجن یعنی بھاپ والا انجن اور تیز چلنے والا یعنی ڈیزل انجن کے مابین ریلوے لائنوں پہ معرکہ آرائی کے آخری دور کے گواہ بھی رہے، اگر بھاپ والے انجن کے ساتھ ہمارا دل ھانپتنا تو دماغ تیز چلنے والے انجن کیساتھ چلتا۔
اور ہم نے دیکھا کہ دل کا یہ سفر تو مقفل ہو چکا ۔۔۔
ھانپتے تھکے انجن کی تین چار جگہوں سے نکلتیں سفید دودھیا بھاپ سیٹیوں سی آوازوں سے بھی دل پزیری کرتیں گویا ہم گرمیوں کی ان چھٹیوں میں موسیقی کا اک چھوٹا سیشن بھی لیتے تھے۔
ہمیں ٹھیک سے معلوم تو نا تھا مگر شیڈ کے اس قلیل دور میں انجن نیچے سے کیسا ہوتا یہ ہم دور سے نیچے بیٹھ کر ہر ممکن کوشش کرتے، ڈرائیو اور انجنیئرز کی آدھ سنی باتوں سے جیسے بہت کچھ جان لیتے تھے، اک رخ دوسرے رخ سے کتنا وابستہ ہے اور اس بھاری وجود کے اندر کی کہانی تشخیصی انداز میں ہمارے ابہام تک پہنچتی، گویا ہم "کیفیات" سیکھ رہے تھے۔
انجن، ڈرائیور انجینئر اور ہم معلومات کی یہ تکون تھی یا بچپن کی ان محبتوں کو دوام دیتا، یاداشتوں کو مستقبل پہ کہیں منعکس کرتا پرزم، گویا اسکی تمام تر روشنیوں کا احاطہ تب ممکن نا تھا۔
ہم اور انجن اپنی اس تشخیص اور تربیت گاہ سے اکھٹے رخصت لیتے، انجن پھر تکونا سفر کرکے سمّہ سٹھّہ ایکسپریس کے آگے جُت جاتا، پہلی سیٹی نا صرف اسکا ارادہِ سفر ہوتی بلکہ اسٹیشن پہ موجود ہر ذی روح اسکی اِس کیفیت میں شامل ہو جاتی، وقتی احساس کے حامل تمام چِند پرند اسکی دوسری سیٹی اور پہلی جنبش سے اسکے سفر میں کبھی شامل نا ہوتے، چوپائے بھاگ جاتے اور پکھی اڑ جاتے، گاڑی مین ٹریک پہ آتی اور ہر بوگی کا اک اک پہیہ ہماری نگرانی میں ایک سے دوسری پٹڑی پہ کسی پکے اور بندھے ہوے راگ پہ کتھک کرتے قدم رکھتا اور یوں ساری ٹرین بل کھاتی گزر جاتی، گویا رقص اور سٌر ہمکنار ہوے، مزید کہ کھڑکیوں اور دروازوں پہ موجود مسکرا کر ہاتھ ہلاتے اور اللہ حافظ کرتے مسافر جسے ہمارے ہی لیے اس طرف اُمڈ اے ہوں۔
گاڑی کے جانے کے بعد تک اسکے اثر میں رھنا گویا سبق کو پکانا تھا اور یہ سبق آج بھی یاد ہے۔
مسجد والی ٹوٹی سے ہاتھوں کی بُک بنا کر خوب سارا پانی پینا اور کبھی کبھار یہاں ظہر کی نماز بھی پڑھنا، مجھے یاد ہے یہاں کچھ عصر کی آزانیں بھی دی ہوئیں ہیں اور جماعت کیلئے کسی بزرگ کے آنے کا تقوع بھی ظہور پذیر ہوتا دیکھا ہے۔
ہمارے گھر سے کوئی دس منٹ کی دوری پہ یہ مقامِ تدریس و تحقیق آج بھی قائم ہے، یہ درسگاہ اب یاداشتوں کی درگاہ بن چکی اور اس درگاہ کی زیارت کا سفر ابھی تک رائج ہے۔
کئی نسلوں سے آباد گُلہریوں کا اپنی فطرت سے بھاگ کر بُڈھے برگد پہ چڑھنا اور بار بار رک کر پلٹ کر اور سیٹیاں بجا کر درگاہ کے مجاوروں اور مسافروں کا فرق بتانا ابھی تک قائم ہے۔

عکس کاری

 شہرِ ادب لاہور کے نام

یہاں کی ہر شمع اور ہر دئیے کے نام۔
جب وقت کاری گزرتا ہے میں عکس کاری کرتا ہوں، بلاعنوان خاکوں سے معتبر کہاوتوں کی بات کرتا ہوں، جب دونوں ہم کلام ہوتے یہ اَن سُنی کہاوتیں افسانہ بن جاتیں ہیں، ان افسانوں میں بلا کی کردارسازی ہے میں ان کرداروں کو تصویر کرکے لمحے کی اسیری سے رہا اور انہیں وقت کی راہ پہ گامزن کرتا ہوں.
یہ میرے کردار ہیں یوں میں انہیں خود تحریر کرتا ہوں گویا وقت کو تصویر کرتا ہوں۔
ظہیر چودھری

یہ میری بلا سے کہ تو مجھے میرا حق نا دے

 یہ میری بلا سے کہ تو مجھے میرا حق نا دے

یہ میرا حق ہے, اس پہ تجھے کوئی گلہ تو نہیں

صحرا اب سے ذرّہ ذرّہ ہو کر ملا کر مجھے

 صحرا اب سے ذرّہ ذرّہ ہو کر ملا کر مجھے

یوں ہوگی تیری وسعت سے شناسائ مجھے

عشق میں شمار نہیں ہوتا

 عشق میں صرف ہونا ہوتا

عشق میں شمار نہیں ہوتا


اُس دن کے چار والنٹیرز میں سے ایک آٹھویں جماعت کے بچے سے میں نے بلیو بیگ سے کٹر نکالنے کو کہا، اسکو ڈھونڈنے میں دیر لگی تو دوسرے بچے نے لوکل یعنی بلتی زبان میں اک اواز لگائی جسکا مطلب تھا "آفس سے کینچی لیتے آو" بیگ سے کٹر بھی مل گیا اور ایک بنا یونیفارم کا بچہ کینچی بھی لے آیا۔ 

میں نے اسکی طرف دیکھا اور شکریہ کہا اور رسی کاٹ کر باندھنے لگا۔۔۔ دوبارہ کاٹنے کی ضرورت پہ اسی نے کینچی پیش کردی۔ 

میں نے پھر شکریہ ادا کیا۔۔۔ اور پوچھا بوائے آپ کونسی کلاس میں ہیں؟

وہ بولا سر میں گریڈ ون ہوں۔ 

اوہ واہ جی، یہاں بچے بڑی عمر میں بھی داخلہ لے سکتے؟ واہ

اور وہ مسکراتے ہوئے بولا، نہیں سر میں ادھر سٹوڈنٹ نہیں ہوں میں گریڈ ون ہوں ادھر میں جاب پہ ہوں۔

 

۔۔۔ اس بار اسکو ہاتھ روک کر دیکھنا بہت فطری سا لگا۔


مسکراہٹ قائم کی اور اس سے کہا اچھا واہ بھئی "تو فائدہ اٹھائیں اور اسی سکول میں پڑھائی بھی کریں"۔

سر یہاں وقت نہیں ہوتا میں تو سب بچوں سے بہت پہلے آتا ہوں اور انکے بعد میں جاتا ہوں۔


۔۔۔ توقف کیبعد میں نے پوچھا، آپکا نام کیا ہے؟

وزیر علی

واہ۔۔۔ خوبصورت نام ہے۔


اچھا تو وزیر صاحب آپ تو پھر بڑے کام کے بندے لگتے ہو آپ تو ساری کلاسز کو اور استادوں کو جانتے ہو، يقينا آپ تو بہت ذہین ہونگے، آپ سے سیکھنا چاہئے کیونکہ آپ تو سکول چلانے والوں میں شامل ہیں۔ گریڈ ون کی تو مجھے خبر نہیں، آپ اب سے میرے لئے گریٹ ون بوائے ہوئے۔

اور وہ باقی چاروں بچوں کی طرف دیکھ کر مسکرایا۔۔۔

اور سب اسکی طرف دیکھ کر ہسے۔۔۔ 


ڈرائینگ کرو گے؟ پسند ہے؟

پینسل سے چیزیں بنانا۔۔۔

۔۔۔ سر بچپن میں تھا


اوکے، وزیر، آج آپ ہماری کلاس میں شامل ہیں، ہم یہ نمائش لگانے کیبعد، ڈرائینگ کی اک ورکشاپ میں اکٹھے ہو رھے ہیں اور آپ کو بھی آنا ہے۔


میں، وزیر اور چار والنٹیرز، وائیر فکسنگ کر کے تصویریں لگانا شروع کر رھے تھے، جب اسکو کسی کام سے پھر آفس بلا لیا گیا۔۔۔

اس بچے کا بار بار شکریہ سننے سے لیکر ڈرائینگ کی کلاس میں شمولیت تک کا مختصر احوال، اسکی آنکھوں میں پڑی ویران مسکراہٹ اور تجسس کا ٹھہراؤ دونوں میرے دل میں گھر کر چکے تھے۔


ڈرائینگ کی کلاس کیلئے مختلف کلاسز سے بچے اکٹھے ہو رھے تھے اور میں نے دو بار اسکو برآمدے میں سے گزرتے، مجھے دیکھتے ہوئے دیکھا۔


بچے چَھٹی کلاس میں جمع ہوئے اور ساتھ میں دو اساتذہ بچوں کو خاموش اور ڈسپلنڈ رکھنے کیلئے اسی کلاس میں آئے، میرا تعارف اردو مکس بلتی میں شروع ہوا تو میں نے معذرت اور مداخلت کی۔۔۔ مسکرا کر استاد صاحب سے التجا کی کہ اگر اجازت دیں تو اب یہ میری کلاس ہوئی، سٹوڈنٹس اور میں خود آپس میں بات کرتے ہیں اور آپ ہماری رہنمائی کیلئے ہمارے ساتھ رہیں۔ 


میں اپنے خیال کو بننے لگا، کلاس جمع ہو چکی تھی اور وہ کلاس سے باھر تھا۔۔۔


بہانے سے بچوں اور اپنے لئے پانی منگوایا، یقینی طور یہ پانی چپڑاسی کو ہی لانا تھا اور وزیر علی کو کلاس میں لانا یہی میری اسوقت کی دلی طلب بھی تھی۔۔۔


اسکو برآمدے میں سے ہی پانی کا کولر، جگ اور گلاس لانے کا حکم مل چکا تھا۔


بچوں کے نام اور تعداد شمار ہوتے ہوتے ہمیں سراب کرنے والا وزیرِ علی بھی آگیا، اس نے میری طرف نہایت ادب اور سوالیہ انداز سے دیکھا۔

مجھے لگا میں مومن خان مومن کی یہ سطر اسکے چہرے اور اس عمل کی بیچ پڑھ رھا ہوں "دریا میں ہے سراب یا سراب دریا میں" 


میں نے پانی لانے پہ کلاس کیطرف سے اسکا شکریہ ادا کیا تا کہ ساری کلاس اس لمحہ اپنی توجہ میری اگلی بات سے جوڑے بھی اور میری بات قوی بھی لگے۔


اس نے پانی کونے میں رکھا اور اساتذہ کے پیچھے کھڑا ہو گیا۔


میں نے اساتذہ کیطرف دیکھا اور کہا سر آج ہماری کلاس میں اک سپیشل انٹری بھی ہے اور میں نے وزیر کو آگے آنے اور بیٹھنے کو کہا۔۔۔


محبت میں قوت تو ہوتی ہے مگر محکوم اور عاجز طالب اسکا استعمال نہیں کر سکتا اور یہ تحریر اس وقت وزیر علی کے چہرے پہ رقم تھی۔

 

اک استاد صاحب نے کہا سر یہ ہمارا گریڈ ون ہے اور اسکے زمہ بڑے کام ہیں اسکو رھنے دیں۔۔۔ اسکا کیا کام۔۔۔ 


میں نے کہا، سر آج تین گھنٹے کیلئے یہ ہماری کلاس کا حصہ ہے اور آپ دیکھیں تو یہ انہی بچوں کا ہم عمر بھی ہے، آج اسکے کام کوئی اور کرے گا اور وزیر علی ہمارے ساتھ ڈرائینگ کرے گا۔


سر آن مائی ھمبل ریکوسٹ۔۔۔ 


اک استاد صاحب نے بتایا کہ ابھی تین پیرڈز باقی ہیں اور اسکو ہر پیریڈ پہ بل بھی بجانی ہوتی۔۔۔

استاد صاحب کی یہ بات بھی میرے دل کے ہر دیچے پہ یوں ہی گونجی جیسے وزیر علی کی گھنٹی سارے سکول میں گونجتی ہوگی اور کئیوں کو جگا دیتی اور نئی ترتیب باندھتی ہو گی۔ 


اس اک لمحے کی گونج نے جیسے میرا سسکنا منجمد کر دیا اور لکنت کھاتے الفاظ سے میں نے کہا۔۔۔

سر معذرت آج میری ریکوسٹ پہ اس کو اس کلاس کا حصہ بننے دیں۔۔۔ اور ساتھ میں، میں نے بچوں کو بھی ریکوسٹ میں ڈال دیا۔۔۔ سب نے کہا یس سر۔۔۔ اور یوں وزیر کو خوشدلی سے قبول کیا گیا۔۔۔ 


یہ اک خیراتی سکول تھا اور یہاں کے بچے نہایت غریب گھروں سے تعلق رکھتے ہیں سو مجھے اس عمل پہ کم ہی مزاحمت اٹھانا پڑی۔  


کلاس شروع ہوئی وزیر علی کی خوشی دیدنی تھی

(یہ بات بس ہم تين ہی جانتے تھے کہ دکھ سے خوشی میں اترتے اور منجمد ہوتے احساس کو کب اور کیسے اظہار کی حدت سے بچانا ہے) واہ کہ اس وقت وزیر علی کا بلند مان دیکھنے سے تعلق رکھتا تھا، اعتماد کے قوی وجود کا یہ سسکتا پہاڑ اپنے سکول کے بچوں کے سامنے جیسے دریائے سندھ پہ اپنا عکس پیش کر رھا تھا۔

میں اس مراقبے کی کیفیت سے جلد نکلنا اور کلاس اسٹارٹ کرنا چاھتا تھا اور جلد ہی میں نے اس غیر مرئی کیفیت پہ قابو پایا۔۔۔ کلاس شروع ہوئی۔


غیر روائیتی گپ شپ کے آغاز نے ماحول کو مزید دوستانہ کر دیا۔۔۔ استاد صاحبان اک اک کر کے کلاس سے نکل گئے۔۔۔


وزیر کا اس کلاس میں آنا بچوں کے صوفیوں جیسے دلوں کو یہ باور کروا چکا تھا کہ ہم سب آج کسی اور جہاں کو تلاش کرنے نکلے ہیں اور وہ جہاں اصل میں انکے اندر ہی موجود تھا۔

آبزرویشن بیسڈ ڈرائینگ کی یہ کلاس وزیر علی کی طرح باقی بچوں کا بھی پہلا ایکسپیرینس تھا۔ سب نے خوب مزہ بھی کیا اور بہت خوبصورت کام بھی کیا۔ 

 

کورے کاغذوں پہ یہ ڈرائینگ کلاس میں ہونے والی پانچویں اسائنمنٹ ہے جس میں بچے درخت کی کہانی بناتے ہیں، انکے دماغ میں لگے اک درخت کی کہانی، اک ایسا درخت جو اپنے ماحول سے جوجتا رھتا ہے، موسموں کے تغیرات میں بھی کیسے محبت قائم کئے ہوئے، فرض کسی قرض کیطرح ادا کرتے ہوئے یوں خاموش رھتے اپنا ربط اپنے ماحول سے جوڑے رکھتا ہے۔  


آبادی سے دریا تک اور پھر اُس پار خشک پہاڑ تلے بھی درخت، اور اسکے ارد گرد پنسل سے بنایا جانے والا ہر لمحہ ماحول کا عکاس ہے، گویا وزیر علی کی یہ درخت کہانی بلتی زبان میں نا لکھے جانے کے باوجود بلتستان کا سیاق و سباق رکھتی ہے۔ یہی تعلق بچے اور درخت کا وجود ہے جس میں نگار کے دل و نگاہ اسکے اطراف کے مسجود ہیں۔ 

   

اس کورے کاغذ پہ اک عدد "8" بھی لکھا ہوا ہے جو اپنے اندر احساس کے کئی سال بن رھا ہے،  دراصل بچوں سے اس اسائنمنٹ پہ اپنا نام، کلاس اور سکول لکھنے کو کہا گیا، میں جیسے یہ بھول ہی گیا کہ میرا خاص سٹوڈنٹ کیا لکھے گا میں نے وزیر علی کی طرف دیکھا اور اس خیال پہ خود کو یار دیرینہ کے در پہ پایا کہ وہ میری ہی طرف خاموشی سے سوال لئے دیکھ رھا تھا، میں آگے بڑھا اور دو زانوی اسکی سامنے بیٹھ گیا، رکو اور سجود کے اس وقف میں یہ خیال آیا اور میں نے اس سے کہا، وزیر اگر آپ سکول نا چھوڑتے تو آج جس کلاس میں ہوتے بس وہی کلاس لکھ دو تو اس نے بےساختہ انداز سے یوں آٹھ کا ہندسہ لکھ دیا۔


کھو جانا اور تہہ تک رسائی کی کوشش کرنا میریے بچپن سے میری فطرت میں شامل رھا ہے میں نے اس لمحے اس کے اس لکھنے کو بھی بالکل آسان نا جانا۔۔۔

گلگت بلتستان کی اس یاترا پہ نکلنے سے پہلے میں "8" کے ہندسے کو شہروز کاشف کیلئے بنائے جانے والے لو گو کو ڈیزائن کرنے سے پہلے اسکے کئی پہلوؤں سے اسکی تحقیق کر چکا تھا اور وزیر علی کا یہ آٹھ لکھنا، میٹا فوریکلی مجھے کئی خیال و جواب دے گیا تھا۔

۔۔۔میں خاموش رھا مگر اسکے سامنے سے اٹھ گیا۔

یوں وہ سرائیت اور میرا وہاں ہونا مجھے یاد رھتا ہے۔ 

#CarbonRoadsideArts #zaheerchaudhry

دونوں جانب موجودگی

 دونوں جانب موجودگی -  درمیاں مقیم اک دستک

کتاب کا آخری صفہ خالی تھا

 کتاب کا آخری صفہ خالی تھا کئی بار الفاظ کی جنبش نے ارادے کو کفر تک پہنچایا, سوچا اس کہانی کو مکمل کروں مگر عہد رفتہ نے شور مچایا یہ جرم ہے یہ جرم ہے اور جرم بھی نیکی کی مانند کہ جسکی نیت سے بھی ثواب واجب ہو جانے ...

پہلے عادی تھا اب طالب ہوں

 پہلے عادی تھا اب طالب ہوں  

پہلے نظر تھا اب چشم ہوں 

کمال ہیں تمام اسباب آگہی کہ  

پہلے راہ تھا اب سماں ہوں

اکیلے تو جو ھجر اٹھائے پھرتا ہے

 اکیلے تو جو ھجر اٹھائے پھرتا ہے

ساتھ چلتے ہیں, بانٹ لیتے ہیں

بس تصویر کو بولنے دو

 بس تصویر کو بولنے دو

اسے اپنی دلیل بننے دو
دیباچه، کہانی اورانجام

سب اسے آشکار کرنے دو

من مائل

 من مائل تو تن گھائل

تن مائل تو من گھائل

حسن کو دیکھیے کہ کیا غضب ڈھاوے ہے

 حسن کو دیکھیے کہ کیا غضب ڈھاوے ہے 

ہے میری جان پہ بنی اور انکو مزہ آوے ہے 

یہ تکلف بھی نہ برتے کہ بھری محفل ہے 

ساتھ بیٹھا رقیب کہ اسکو بھی منہ لگاوے ہے

تصویر دعا ہے

 بیتے لمحوں کی

گزرے راہوں کی

ان سنی سی

ان کہی سی

مقفل پڑی ہیں 

ھزار کہانیاں

پرانی تصویریں

چہرے یا افسانے

آنکھیں یا سراب سرائے

دوری میں لمس کا احساس 

آوازوں کا ہجوم 

راستوں کی پکار

تصویروں سے آوازیں آتیں ہیں

تصویر فریاد ہے

تصویر یاد ہے

تصویر دعا ہے

دعا بیتے لمحوں کی

دعا گلیوں کی رونق کی

آو ہاتھ اٹھائیں 

آو تصویر دکھائیں 

تصویر بیتے لمحوں کی

تصویر گلیوں کی رونق کی

  

Knocking At Windows

Online photography exhibitions 

#socialdistancing

تیری زیروزبر نے

 تیری زیروزبر نے یوں بڑھا دیا بیان میرا

وگرنہ میرے قصے میں تھا بس وہم میرا

تیرے خط جلا چکا

 تیرے خط جلا چکا

میرے پر جلا چکا

فقط آسمان باقی اب

زمین کے در بھلا چکا

نفرتوں پر یقین رکھتے ہیں، ٹھیک مرتے ہیں ھم

 نفرتوں پر یقین رکھتے ہیں، ٹھیک مرتے ہیں ھم

جہاں آدم جانا جاۓ، در کو دھرم لکھتے ہیں ھم

عداۓ سازش و مرھم ک یقین سے

دمادم مست بین، مسجد میں اعلان کرتے ہیں ھم

تیری یاد کے سوا کچھ یاد نہیں

 تیری یاد  کے سوا کچھ  یاد نہیں 

میں لامکاں کب سے کچھ یاد نہیں 

روابط  خاموشی کی زدّ میں ہیں 

 قیامِ خاموشی  کب سے یاد نہیں

ترے ناں تے میرے سونیا وے

 ترے ناں تے میرے سونیا وے

میرا دل دھڑکے - میرا دل دھڑکے


نۓ عیسوی سال کے ٹھیک چوتھے دن صبح سویرے ہمارے عیسائی پاکستانی بہن بھائی اپنی صفائی کرنے کی  ذمداری پہ نظر آے گو کہ آج سنڈے تھا انکی عبادات کا دن مگر ١٢ ربیع اول ہماری عام تعطیل اور انکے کام کرنے  دن تھا، ان محنت اور صفائی کرنے والے لوگوں تک الله کہ آخری نبی کے وارثوں ںے رحمت لالعالمینﷺ کا ثمر ابھی ان تک نہیں پہنچایا تھا. 

یہ کوئی مذہبی ذمداری ہوتی تو شاید شہر بھر کا ہمارا اپنا گند ہم خود صاف کرتے یا پھر٢٥ دسمبرکو الله کے اک اور نبیؑ کی پیدائش والے دن ہم اپنے شہروں کے صفائی نہ سہی  ہمارے عیسائی پاکستانی بہن بھائی کی تنگ گلیوں والوں محلوں میں جا کرہی صفائی کرتے ... خیر سردیوں کی ٹھنڈ اور دھند میں یہ لوگ مسلمانوں کی فجر کی نماز سے بھی پہلے اپنے کام پہ موجود تھے ... سڑکوں اور ملحقہ گلیوں کی صفائی اور پھر دھلائی کا کم چلتا رہا اور دوسرا مرحلہ چونے سے تزئین و آرائش کا  شروع ہوا، تین پہیوں والی ریھڈی میں چونا لیے اگر مرد ریھڈی چلاتا تو عورت راستوں پہ چونے سے پھول پتے بناتی اور اگر عورت ریھڈی چلاتی تو مرد سیدھی لمبی لمبی لائنیں لگاتا ...  دستانوں کے بنا چونے میں انکے کالے صفائی کرتے مقدس ہاتھ سفید چونے والی ریھڈی سے زمین تک اس طرح جڑ کہ آتے جسے دعاؤں والے خالی ہاتھ جڑ کر آسمان کی طرف  جاتے ... یہ سلسلہ کافی دیر تک چلتا رہا اور دیکھتے ہی دیکھتے راستوں میں لوگوں کی تعداد بڑھنے لگی لوگوں کو صبح سویرے یہ تبدیل منظر بھلا لگا اور چہروں پر اسکے نمایاں اثرات دیکھے جا سکتے تھے خاص طور پر بچے شہر کو صاف اور آراستہ دیکھ کرخوب خوش تھے ... گھروں میں ناشتون اور خوشبوؤں کا سلسلہ شروع ہوا، دکانیں بند تھیں سو گھروں سے  حلوہ اور پراٹھوں کے سلسلے ... دن نکلتا گیا روشنی دھند میں بڑھتی رہی اور دھند چھٹ گئی ... بازار میں چھوٹے چھوٹے ١٢ ربیع اول کے جلوس شروع ہوے اور گہما گہمی تیز ہوتی گئی، انڈین گانوں کی دھنوں پر بننے والے ترانے، نعتیں اور نعروں سے ماحول کو خوب ترڈکا لگا 

ترے ناں تے میرے سونیا وے

میرا دل دھڑکے - میرا دل دھڑکے

عربوں کے دبئی میں فلمایا گیا دپیکا کا گانا بھلا کیوں نہ یاد آتا چاہے لمحہ بھر کو ہی سہی ... اتنے میں دیکھتے ہی دیکھتے شہر کا بڑا مرقضی جلوس برآمد ہوا جسکی سرداری عرب لباس پہنےاور ہاتھ میں تلواریں لیے بچے کر رہے تھے اب بھلا دپیکا یہاں کب تک ٹھرتی ... خوب بھرا جلوس، سبز رنگ خاصا نمایاں اور قدر اونچا بھی تھا جھنڈوں اور بینروں پہ کلمات اور علامات  درج ... دوسرا خاص رنگ سنہرا تھا الله معاف کرے یہی سارے رنگ دپیکا کے اس گانے کی آرٹ ڈائریکشن میں استعمال ہوے تھے ... بہت مشکل تھا تماشائی ہوتے ہوۓ خود کو جھومنے سے روکنا مگر یہ وقت خاصا مشاھدے کا تھا سو اک سوچ آۓ اک جاۓ لیکن مجھے تو اتنے شدید شور میں جہاں ہر ٹرالے، ہر گاڑی اور ہر سواری پہ اپنا اپنا جھنکار مکس ترانہ یا نعت سبقت لینے کہ لیے تھا وہاں 

ترے ناں تے میرے سونیا وے

میرا دل دھڑکے - میرا دل دھڑکے

کا اک خاص ماحول تھا ... ابھی شام باقی ہے شام کا ماحول شام کے مطابق ہوگا 

رانگ برنگی پگڑیوں میں لپٹا ہوا ١٢ ربیع اول باقی ہے

NCA Triennale 2025 - Carbon Roadside Arts

CARBON ROADSIDE ART